Preshevë, dështon “bashkëpunimi” Rama – Vuçiç, shkollat shqipe pa tekste bojkotojnë mësimin

Rreth një vit pas premtimit të kryeministrit shqiptar Edi Rama në vizitën e tij në Preshevë, shkollat shqipe, paralajmërojnë bojkot të mësimit, për mungesën e teksteve në gjuhën shqipe.
Duke “i besuar” homologut Vuçiç, Rama garantonte në nëntorin e viti 2014, “që ai personalisht (Vuçiç) dhe qeveria serbe do të angazhohen personalisht për përmirësimin e infrastrukturës shkollore”.
Por, rreth një vit pas këtij premtimi, shkollat fillore dhe të mesme që mësojnë në gjuhën shqipe në Preshevë, kanë vendosur që nesër të bojkotojnë orën e parë të mësimit, pasi arsimi në gjuhën amtare, nuk po respektohet ashtu siç është i garantuar me ligjet dhe Kushtetutën në fuqi.
Ky vendim është marrë në mbledhjen e mbajtur mes Këshillit Kombëtar Shqiptar dhe drejtorëve të shkollave fillore dhe të mesme me mësim në gjuhën shqipe në Luginën e Preshevës.
Në një komunikatë për media të dalë nga kjo mbledhje thuhet se në shkollat që mësojnë gjuhën shqipe ende nuk ka arritur donacioni prej 103,222 tekste mësimore nga Republika e Kosovës. Ato tekste sipas komunikatës kanë mbetur të bllokuara që nga data 10. 09. 2015 në doganën e Preshevës.
“Deri tani Këshilli Kombëtar Shqiptar i është drejtuar të gjitha institucioneve shtetërore të Republikës së Serbisë dhe përfaqësive ndërkombëtare, për zgjidhjen e kësaj çështje të ndjeshme dhe komplekse. Por nuk ka pas gatishmëri institucionale dhe vullnet politikë që në mënyrë serioze të zgjidhet mungesa e teksteve mësimore në gjuhën shqipe e aq më pak për lirimin e teksteve nga dogana”, thuhet më tutje në komunikatë.

Premtimi i Edi Ramës, rreth një vit më parë në Preshevë

“Nga ana tjetër, jemi të vetëdijshëm për vështirësitë që ju keni këtu në Luginë për tekstet shkollore dhe e dimë edhe fondin e ndihmës së akorduar, bashkë me qeverinë e Kosovës, por kjo është shumë pak. Për këtë arsye bashkë me Kryeministrin Vuçiç, jemi fokusuar tek domosdoshmëria për ta parë me sy kritik gjendjen e infrastrukturës arsimore në Luginë dhe cilësinë e arsimit, kuptohet dhe tekstet. Do të bashkëpunojmë edhe me qeverinë e Serbisë, do të bashkëpunojmë edhe me përfaqësuesit këtu që kjo situatë të ndryshojë. I kam kërkuar shprehimisht Kryeministrit të Serbisë, nëse duhet ta thosha këtu me zë të lartë që ai personalisht dhe qeveria serbe do të angazhohen personalisht për përmirësimin e infrastrukturës shkollore dhe spitalore e për t’i dhënë fund odisesë së papranueshme të gjithë nënave të reja që për të lindur fëmijët duhet të ikin me dhjetëra e dhjetëra e dhjetëra kilometra larg. E shprehimisht më ka thënë ‘Po’. Shpresoj dhe besoj që ta mbajë fjalën se pastaj nuk dua që kur t’i them nuk e mbajte fjalën, të thotë është provokim”.

/DRONI.al/