Korporata Elektroenergjetike Shqiptare (KESH) ka nisur importin e energjisë elektrike, diktuar nga niveli i ulët i ujit në Liqenin e Fierzës. Sipas informacioneve nga kjo korporatë, mësohet se ky import, është i pari për këtë vit.
Një gjë e tillë tingëllon absurde, kur lajmet për përmbytje nga shirat në pothuajse në të gjithë vendin, janë kryefjala për sot.
Megjithatë KESH vazhdon në të tijën. Të dhënat e fundit sipas KESH, tregojnë se Fierza ka rënë në kuotën e 272 metrave nga 296 m që është maksimumi i lejuar.
Drejtori i Divizionit të Gjenerimit, Ilir Belba, thotë se blerja e energjisë elektrike po përballohet me fondet e Korporatës, pa prekur garancinë sovrane të Qeverisë.
Referuar programit ekonomik të KESH, deri në fund të vitit Korporata ka në dispozicion 20 milionë euro për të mbuluar nevojat e vendit për blerje të energjisë, ndërkohë që vetëm për tetorin janë blerë 7.2 milionë euro energji elektrike.
Të dhënat nga kaskada e Drinit tregojnë se dy hidrocentralet e tjera, Komani dhe Vau i Dejës nuk kanë pasur rënie, por sërish kapaciteti i tyre varet nga Fierza që ka grumbullimin kryesor të ujit.
Shqipëria përmbytet nga shirat, KESH importon 7.2 milionë euro energji
