Policia e Vlorës ka sqaruar ngjarjen e cila ndodhi në orët e vona të së hënës (28 shtator), në Vlorë, ku persona të armatosur qëlluan me armë zjarri në drejtim të uniformave blu.
Sipas njoftimit të policisë peronat e arrestuar Ilir e Vasil Birçaj dhe Martin Hitaj dyshohet se do të kryenin një grabitje me armë. Personat dyshohet se janë pjesë e një grupi kriminal brenda dhe jashtë vendit, pasi njëri prej të arrestuarve, Martin Hitaj është i dënuar në Itali me 6 vjet burg për trafik droge.
Ngjarja
Ngjarja ndodhur mbrëmjen e së hënës ku policia u vu në ndjekje të dy automjeteve të cilat po lëviznin me shpejtësi.
Sipas njoftimit zyrtar të policisë lokale, mësohet se, “ditën e djeshme më datë 28. 09. 2015, rreth orës 23:00, Policia e Vlorës, gjatë një shërbimi për kontrollin e mjeteve dhe personave që lëvizin me armë zjarri dhe sende të kundërligjshme, të vendosura në dy pika kontrolli në vendin e quajtur Sherishtë, një nga grupet e shërbimit ka konstatuar dy automjete, një ‘Benz’ me targë AA 191 HS dhe një ‘Land Rover’ me targë VL 1553 D, të cilët po ecnin me shpejtësi në drejtim të tyre”.
Sulmi
Njëri prej mjeteve ka qëlluar 5 herë mbi policinë për ta zmbrapsur, por blutë e Vlorës i janë kundërpërgjigjur me armë.
“Shërbimi i Policisë ka dhënë sinjal për ndalimin e automjeteve por personat nuk i janë bindur urdhrit të Policisë. Në këto momente shoferi i mjetit ‘Land Rover’ ka qëlluar 5 herë me Pistoletë me qëllim për t’i zmbrapsur forcat e Policisë. Shërbimet i janë kundërpërgjigjur me zjarr personave dhe janë vënë në ndjekje të tyre por për shkak të kushteve të vështira dhe errësirës, autorët janë larguar me shpejtësi”, sqaron më tej polica.
Arrestimi
Ka qenë një postbllok i dytë që ka ndaluar dy mjetet, ku personat e mjetit nga u qëllua policia u larguan duke përfituar nga errësira, ndërsa u ndaluan 3 persona të makinës tjetër, kur një prej tyre ishte i plagosur.
“Menjëherë, shërbimi ka komunikuar me efektivët e tjerë të vendosur në pikën tjetër të kontrollit e cila ka bërë të mundur ndalimin e të dy mjeteve që po lëviznin njëri pas tjetrit në drejtim të Vlorës. Personat e mjetit, Land Rover, kanë përfituar nga errësira duke ndryshuar drejtimin e rrugës dhe janë larguar menjëherë duke braktisur mjetin Land Rover. Shërbimet e Policisë kanë bllokuar menjëherë mjetin Benz, duke bërë të mundur kapjen dhe arrestimin në flagrancë të 3 shtetasve të mësipërm, ku ka rezultuar që njeri prej tyre ishte i plagosur”.
Pista
Pista kryesore e Policisë është përgatitja e grupit të mësipërm për kryerjen e një grabitjeje me armë zjarri dhe me maska për të fshehur identitetin e tyre.
Martin (Erton) Hitaj, pasi është pyetur ka deklaruar se është plagosur në fshatin Kotë, megjithatë Policia po heton në lidhje me zbardhjen e ngjarjes pasi rezulton për shkaqe akoma të paqarta.
Policia e Vlorës po punon për identifikimin dhe kapjen e personave të larguar dhe po hetohet për sqarimin e plotë të rrethanave.
Sekuestrimet e policisë
2 armë zjarri Automatikë model 56’,
4 krehra të mbushur me 100 fishekë model 56’,
120 fishekë model 56’,
18 fishekë armë gjahu të kalibrit 12 mm,
5 fishekë të kalibrit 9 mm,
3 maska pambuku të zeza,
2 kapele sportive,
1 jelek i verdhë fosforeshent,
3 palë dorëza plastike
2 palë dorëza pambuku të zeza,
2 aparate celularë (Nokia & I Phone),
1 palë syze dielli,
3 automjete të cilat ndodheshin në vendin e ngjarjes (Land Rover – VL1553D, Benz – AA191HS, Mitsubishi – AA296AH).
Për më shumë mund të lexoni edhe …
Vlorë, sulmojnë me armë me policinë në postbllok, arrestohen dy vëllezrit Birçaj
/web/Vlore_sulmojne_me_arme_me_policine_ne_postbllok_arrestohen_dy_vellezer_Bircaj_7732_1.php
