SHKËLZEN BERISHA/ Ekspozitat e Edi Ramës si piktor dhe “ekspozitat” si kryeministër me azikërkuesit shqiptarë

1500 euro një pikture, 1300 euro një shqiptar

Ndërkohë që numri i azilkërkuesve shqiptarë në Gjermani vetëm për 2015 po shkon drejt 50.000, kryeministri jo vetëm nuk ka shkuar kurrë ti takojë e dëgjojë për arsyet që i shtyjnë të largohen dhe kushtet ku akomodohen, por ka vendosur të çelë një ekspozite vetjake pikture, pikërisht në vendin me numrin më të madh të azilkërkuesve shqiptarë në BE.
Në fakt Rama ka hapur shumë ekspozita njëherësh në gjithë Gjermaninë, por vetëm në njërën syresh ekspozon punët e tij si piktor. Në pjesën më të madhe ekspozitave të shpërndara në të katër anët e Gjermanisë, atyre që kanë dhjetëra mijëra “punime” e me mijëra vizitorë, staf, punonjës sigurie e mbi të gjitha vëmendje mediatike kombëtare dhe ndërkombëtare, ekspozohen dhimbshëm para gjithë botës “punët” e Ramës si kryeministër.
Sipas raportimeve një pikture e Ramës në ekspozitën e tij si piktor shitet 1500 euro, ndërsa një shqiptari në ekspozitat e Rames si kryeministër i ofrohen 1300 euro nga shteti gjerman, për t’u kthyer andej nga ka ardhur.
E di që punimet e tij si piktor për momentin shiten pak më shumë se “punimet” e tij si kryeministër por këto të fundit janë më të shumta në numër dhe të ekspozuara kudo. Mbase është momenti të kuptojë se “fiton” më shumë duke mbyllur ekspozitat e tij si kryeministër sesa duke çelur ato si piktor.

/DRONI.al/