Pas shumë vitesh nga aplikimi i tatimit të sheshtë, Fondi Monetar Ndërkombëtar ka dhënë vlerësimin se, kjo reformë specifikisht në Shqipëri solli bumin të ardhurave para vitit 2008, ndryshe nga vendet e tjera të rajonit, në të cilat begatia në arkëtimet buxhetore erdhi për arsye të zhvillimeve ciklike të ekonomisë evropiane të tërësi. Ky vlerësim vjen surprizë duke marrë në konsideratë faktin, se Fondi orientoi me këmbëngulje qeverinë e re që të rikthente tatimin progresiv në paketën fiskale të vitit 2014
Shumica e shteteve të Ballkanit Perëndimor panë rritje të mëdha në të ardhurat e përgjithshme të qeverive si përqindje e PBB-së para vitit 2008, referon Fondi në një material të publikuar ditët e fundit për ecurinë e deficiteve buxhetore në vendet e Ballkanit Perëndimor në 15 vitet e tranzicionit.
Faktorët ciklike, që rezultojnë nga rritja e fortë ekonomike dhe lulëzimi i konsumit, ishin pjesërisht përgjegjës për të ardhurat të forta, pavarësisht nga shkurtimet diskrecionare në normat e taksave në disa raste. Këta faktorë ciklike ishin veçanërisht të konsiderueshëm në Mal të Zi dhe në një masë më të vogël në Kosovë, Shqipëri, dhe Kroaci, vëren FMN.
Megjithatë, reforma të rëndësishme fiskale janë zbatuar në shumë vende të Ballkanit Perëndimor edhe në kuadrin e programeve të Fondit. Këto reforma përfshinin ndërtimin e kapaciteteve institucionale dhe zgjerimin e gamës së instrumenteve tatimore, të tilla si në Kosovë. Veçmas në Shqipëri efikasiteti i mbledhjes së taksave i dedikohet thjeshtimit të sistemit tatimor vëren FMN. Rritja e të ardhurave gjatë viteve 2000 ka qenë më pak i theksuar në Kroaci dhe Serbi, ku përmirësimet në administrimin e taksave kishte filluar më herët.
(Monitor)
