Një letër e pretenduar nga babai i dy vajzave që tentuan të helmojnë prindërit, i vunë flakën shtëpisë dhe i morën kursimet familjes Kajtazi do të hedhë më shumë dritë mbi ngjarjen që shokoi opinionin publik në Durrës.
Sipas Hiqmet Kajtazit në letër shkruhej: “Hakun ta morëm. Shtëpinë ta dogjëm. Gocat s’ke për t’i parë”. Por burime nga policia e Durrësit thonë se një letër e tillë nuk është gjetur, pavarësisht pretendimit të babait të vajzave.
Të njëjtat burime saktësojnë se ka dyshime se vajzat mund të jenë larguar me dëshirë nga familja dhe të mos jenë detyruar nga dikush tjetër. Megjithatë nuk përjashtohet mundësia që ato të jenë mashtruar.
Nuk është hera e parë që Orialda 18 – vjeç dhe Klevisa 14 largohen nga banesa e tyre. Dy herë të tjera ato kanë qëndruar për disa ditë larg shtëpisë. Pasi kanë shpenzuar paratë që kishin me vetë dy vajzat janë kthyer serish në shtëpi.
Motrat Kajtazi sipas policisë së Durrësit kanë helmuar dhe dy herë të tjera babanë nënën dhe motrën e tyre të madhe. Por simptomat kanë qenë më të lehta dhe pas mjekimit ata kanë lënë spitalin. Herën e fundit prindërit e vajzave Kajtazi u sollën me urgjencë në Tiranë për shkak të gjendjes së rënduar. Ndërkaq policia thotë se vazhdon hetimet duke këqyrur telefonat dhe rrjetet sociale të dy vajzave, për të provuar nëse janë mashtruar nga dikush.
Dy motrat adoleshente rezultojnë të zhdukura prej datës 15 korrik. Familjarët vendosën ta bëjnë publik rastin për shkak se policia dhe prokuroria e Durrësit nuk dinë vendndodhjen e tyre. Ato tashmë akuzohen për tentativë vrasjeje, djegie të shtëpisë dhe vjedhjen e një sasie parash.
Tre akuza për dy motrat Kajtazi
