Shkak i atentatit të parandaluar nga Policia e Tiranës ditën e martë është një borxh i pakthyer nga emigranti që ishte dhe objektivi i sulmit. Blutë e kryeqytetit janë të rezervuar në dhënien e informacionit për identitetin e tij, duke qenë se dy personat që kanë kryer porosinë për një minë me sahat janë shpallur në kërkim dhe i tremben një hakmarrje të mundshme.
Policia e Tiranës njoftoi zyrtarisht pasditen e të martës se kishte arrestuar Julian Shorja 29-vjeç dhe të fejuarën e tij Riva Tomi 26 vjeç.
Sipas policisë 29-vjeçari po përgatiste një minë me sahat për llogari të shtetasit me inicialet Sh. P. Ky i fundit në bashkëpunim me shtetasin me inicialet M. A., do të kryenin një atentat ndaj një emigranti i cili sapo ishte kthyer nga jashtë Shqipërisë.
Policia ende nuk ka të sqaruar pozicionin dhe rolin e Riva Tomit në këtë histori. Detaje për mënyrën, vendin dhe strategjinë që do të ndiqej në kryerjen e atentait priten të zbardhen pas marrjes në pyetje të dy të arrestuarëve.
Në cilësinë e provës materiale në shtëpinë e Shorjas policia gjeti dy kapsolle detonatore, municion luftarak dhe kanabis sativa. Çifti pritet të dalë nesër para Gjykatës së Tiranës për t’u njohur me masën e sigurisë dhe akuzat që janë ngirtur mbi ta.
Tiranë, atentati i parandaluar, për çështje borxhi
