Një person i arrestuar nga policia në fundjavë me akuzën e vjedhjes rezulton se ka dalë pak kohë më parë nga burgu. Shtetasi Rrahman Domi, i arrestuar si autor i vjedhjeve së vilave rezidenciale në Farkë, ka qenë i dënuar për akuzën e grabitjes së tre turistëve polakë dhe tentativës për përdhunimin e një femre që ishte pjesë e grupit të turistëve që vizitonin Tiranën, shkruan “Panorama”.
Rrahman Domi është dënuar me nga pesë vite për secilin krim, por gjykata i bashkoi dënimin, duke i dhënë në total 7 vite burg. Pas këtij veprimi, nga ana e gjykatës është pranuar edhe gjykimi i shkurtuar çka i garantoi të pandehurit uljen e një të tretës së dënimit dhe zbritjen e penalitetit ndaj tij në 4.8 vite burg. Policia ka thënë se ky person është cilësuar i rrezikshëm për shoqërinë.
Pak javë më parë, shtetasi Rrahman Domi ishte lënë i lirë nga ana e gjykatës, ndërsa duket se nuk ka humbur kohë t’i kthehet aktivitetit të vjedhjes së banesave. Ai është i dyshuar për vjedhjen e vilave rezidenciale në zonën e Farkës.
Në harkun kohor të tri ditëve, dyshohet se ai ka grabitur 6 banesa në Farkë, në zonën e vilave rezicendiale. I dyshuari po hetohet nga policia edhe për disa krime të tjera ndaj pronës në zonën e Saukut dhe në Rrugën e Elbasanit. Policia e Tiranës ka thënë se ka shpallur në kërkim edhe dy persona të tjerë të dyshuar si bashkëpunëtorë në vjedhjen e bllokut të vilave në Farkë.
Përdhunuesi i polakes në 2012, hajdut vilash në 2015
