Kryeministri Edi Rama ka bërë sot thirrje për një angazhim më serioz në aspektin e rendit publik, duke paralajmëruar shkrirjen e policisë bashkiake dhe pajisjen e kryetarëve të bashkisë me kompetenca për të dhënë direktiva në Policinë e Shtetit, “me qëllim ruajtjen e rendit dhe qetësisë”.
Këtë paralajmërim Rama e ka bërë sot ndërsa ka pritur në një takim, krerët e rinj të bashkive të dalë nga zgjedhjet e 21 qershorit.
Pasi u ka uruar të gjithëve “suksese dhe punë të mbarë”, Rama ka shprehur keqardhjen për mungesën e kryebashkiakëve të djathtë, përveç atyre të Përmetit dhe Dropullit.
Ndër të tjera, takimi ka në qendër të diskutimeve, edhe koordinimin e fazës së tranzicionit në 61 bashki, në kuadër të reformës së re territoriale.
Duke renditur prioritetet e këtij bashkëpunimi të ri, kryeministri e ka vënë fillimisht theksin tek ndërtimi apo riparimi i ujësjellësve dhe kanalizimeve të ujërave të zeza, për të vijuar më pas me problemet e mbeturinave.
Shkrihen policitë bashkiake, kryebashkiakët kompetenca mbi Policinë e Shtetit
