Aksion ndërkombëtar antidrogë në 33 shtete, përfshirë Shqipërinë, kapen 2.8 tonë drogë, 500 persona në pranga

Më shumë se 500 të arrestuar dhe 2.8 tonë kokainë e sekuestruar është bilanci i një operacioni ndërkombëtar, pjesë e të cilit ka qenë edhe Shqipëria. Në kuadër të operacionit “Blue Amber”, i shtrirë në më shumë se 30 shtete dhe me mbështetjen e EUROPOL-it, oficerët ligj-zbatues të 28 shteteve të BE-së dhe partnerë ndërkombëtarë kanë bashkëpunuar për të zbuluar grupet e krimit të organizuar dhe infrastrukturën e tyre.
Pas operacionit të shtrirë në disa shtete të botës, për afro një muaj e gjysmë u arrestuan 500 të dyshuar si persona të përfshirë në trafik të lëndëve narkotike, në trafikun e qenieve njerëzore, të dyshuar për trafikim të armëve, falsifikim të mallrave, mundësim të imigracionit të paligjshëm, apo edhe për vepra penale të lidhura me krimin kompjuterik. Ndërkohë, u konfiskuan 390 mjete dhe afro 1300 tonë metale të vjedhura. Për sa i përket luftës kundër trafikimit të lëndëve narkotike, brenda kësaj periudhe kohore u arrit të sekuestroheshin 2.8 tonë kokainë dhe 110 kg heroinë. Edhe këtë herë, specialistët kanë arritur të konfirmojnë sërish se kontejnerët përdoren për trafikimin e sasisë së madhe të lëndëve narkotike, ndërsa pakot dhe korrierët përdoren për volumin e ulët të trafikimit.
Vendet pjesëmarrëse ishin: Shqipëria, Bosnja dhe Hercegovina, Kolumbia, Maqedonia, Moldavia, Mali i Zi, Norvegjia, Serbia, Zvicra, Shtetet e Bashkuara, Kanadaja, Islanda, Turqia, Nigeria, Abu Dhabi, Australi, Dubai, Hong Kongu, Indonezia, Malajzia, Zelanda e Re, Filipinet, Katari, Tajlanda, Panamaja, Kosta Rika, Ekuadori, Peruja, Republika Dominikane, Brazili, Meksika, Guatemala dhe Bolivia. Njëkohësisht, operacioni u mbështet nga Komuniteti i Policisë e Amerikave (Ameripol), Konventa e Bashkëpunimit Policor për Sekretariatin e Europës Juglindore (PCC-SEE), Qendra Ligjzbatuese për Europën Juglindore (SELEC), Rrjeti Europian i Policisë Rrugore (TISPOL), Misioni i Bashkimit Europian i Asistencës Kufitare për Moldavinë dhe Ukrainën (EUBAM), Frontex, Interpoli dhe Eurojust. Ky operacion erdhi pas operacionit të suksesshëm njëjavor “Archimedes”, i organizuar vitin e kaluar, i cili çoi në arrestimin e mbi 1000 individëve dhe konfiskimin e afërsisht 2.7 tonëve drogë.

/DRONI.al/