Meta: Qeveria të ecë më shpejt, ndryshimet i di Rama

Kryetari i Lëvizjes Socialiste për Integrim, Ilir Meta, njëkohësisht kryetar i Kuvendit, tha dje se qeveria duhet të ecë më shpejt në rrugën e përmbushjes së objektivave të saj. I pranishëm në ceremonisë festive të 24-vjetorit të krijimit të Partisë Socialiste, Meta tha se ndryshimet në qeveri janë kompetencë e Kryeministrit dhe se është ai që e ndien nevojën për t’i bërë ato.
“Është një pyetje që duhet t’i drejtohet Kryeministrit. Ai e ndjen më shumë se kushdo nevojën për ndryshime, për ne është e rëndësishme që qeveria të ecë më shpejt në rrugën e përmbushjes së objektivave të saj dhe njëkohësisht ndjekim me shumë vëmendje krizën greke, e cila mesa duket pritet të ketë impaktet e saj dhe në vendet partnere, përfshirë dhe Shqipërinë”, u shpreh Meta.
Kreu i LSI-së vlerëson rezultatin e zgjedhjeve vendore të 21 qershorit, ndërsa shprehet se opozitës i takon që në ato bashki ku ka fituar të tregojë modelin e saj më të mirë. Për kreun e Kuvendit, e rëndësishme është që qeveria të bashkëpunojë me të zgjedhurit vendorë në shërbim të qytetarëve. I pyetur lidhur me ambicien e kreut të PS-së Edi Rama për rritjen e anëtarësisë së kësaj partie në 150 mijë anëtarë deri vitin tjetër, Meta tha se “kjo është një sfidë që tregon vullnetin e lidershipit të kësaj partie për të ecur në rrugën e rritjes së saj dhe kontributit për të mbajtur të gjitha përgjegjësitë që ka marrë përpara qytetarëve.

/DRONI.al/