Me 178 vota pro të partive politike në koalicionin qeveritar si dhe 120 vota kundër, parlamenti grek miratoi sot në orët e para të mëngjesit kërkesën e qeverisë Tsipras për referendumin me 5 korrik të këtij viti.
Brenda një jave grekët do të informohen dhe do të vendosin nëse do të pranojnë propozimin e huadhënësve të Athinës. Pjesëmarrja duhet të kalojë shifrën prej 4 milionë votuesish, në mënyrë që ai të jetë i ligjshëm.
Eurogrupi i cili nxori jashtë gjatë takimit të tij ministrin grek të Financave ka kundërshtuar të japë shtyrje disaditore të programit të ndihmës për Greqinë. Programi i ndihmës mbaron më 30 qershor dhe ekonomia e vendit, sistemi bankar ndodhen në një rrezik financiar të madh.
Me ankth po pritet edhe vendimi i BQE nëse do të vazhdojë të furnizojë bankat greke këto ditë, ndërkohë që thuhet se mund të vendoset sistemi i kontrollit të kapitalit, për të parandaluar transferimin masiv të parave nga bankat greke jashtë vendit.
