Në një koment botuar në Panorama, Preç Zogaj shkruan se “Opozita ka realisht arsye të tërheqë një frymëmarrje gëzimi që ka hapur garën, dhe madje i ka shkuar shumë afër fitores në një numër të madh bashkish, siç janë Berati, Saranda, Gjirokastra, Maliqi, e tjerë, ku bastet zgjedhore nuk i jepnin asnjë shans. Opozita ka arsye të mbajë shënim si një lajm të mirë faktin që ka ngushtuar dukshëm rezultatin e saj tepër negativ në disa bashki të tjera, bastione të së majtës, dhe këtu meriton të përmendet si një shembull i jashtëzakonshëm rezultati që ka shënuar kandidati demokrat për Bashkinë e madhe të Fierit, Enkelejd Alibeaj.
Diferencën prej dyzet e tetë mijë votash në favor të së majtës në territorin e Bashkisë, Alibeaj e ka zvogëluar mbi katër herë. Në gjithë qarkun e Fierit opozita ka marrë rreth tetëdhjetë mijë vota përkundrejt nëntëdhjetë e shtatë mijë votave të koalicionit qeveritar, që kësaj radhe kishin me vete edhe partinë e çamëve. Pra, diferenca e votave të kandidatëve në këtë qark është reduktuar në shtatëmbëdhjetë mijë vota. Po të përkthehej ky rezultat në votë politike, mandatet në Fier nuk do të ishin dymbëdhjetë me katër siç janë sot, por maksimalisht nëntë me shtatë në favor të së majtës”.
