Berisha: Në këshillat e bashkive kriminelë të tmerrshëm

Berisha ka alarmuar sërish, por kësaj here jo për kandidatët për kryetarë bashkie që kanë rekorde kriminale por për anëtarët e këshillit bashkiak. “Në këshillat e bashkive ka kriminel të tmerrshëm, ka nga ata që lajnë dhjetëra e mos më shumë para droge e prostitucioni dhe për ta nuk është folur fare”. ka deklaruar ish-Kryeministri Berisha në një intervistë telefonike dhënë gazetarit Sokol Balla në orën 02:00 të mëngjesit të sotëm.

Në vijim Berisha duke shpjeguar deklaratën e tij për zgjedhjet dhe votimet dhënë një ditë më parë, ka thënë se “çdo shqiptar besoj ka parë fushatën më me salltanet dhe më pompoze në historinë e vendit, dëshmi e vërshimit të lumenjve të parave të drogës, prostitucionit dhe krimit. Kanë parë qytetarët shqiptarë atë që nuk kanë parë ndonjëherë, gjithnjë punonjësit e administratës për mendimin tim kanë marrë dhe duhet të marrin pjesë në fushatën elektorale, por kurrë infrastruktura e institucioneve. Kësaj here, si asnjëherë tjetër shkollat, spitalet, repartet ushtarake, policia e shtetit gjithçka u vu në funksion të mazhorancës, u krijua një pabarazi e paimagjinueshme, nuk ka ndodhur kurrë në një vend, që një javë para përfundimit të fushatës të sekuestrohet një televizion që ishte kritik ndaj qeverisë dhe do të theksoj një gjë, akti ishte më i poshtri, më i ulëti, më i pafytyri që mund të behet, sepse në atë mënyrë siç veproi Edi Rama me “çorapen” e tij të akuzojë për larje parash transaksionin pa pritur përgjigje. Çdo transaksion edhe mund të jete larje parash, por para se ta shpallë qeveria të tille, institucionet marrin përgjigjen. Ja që doli që paratë janë të gjitha të “Deutche Bank”, çfarë thotë tani i pa fytyri që sekuestroi një media televizive sikur të ishte një kioskë. A veprohet në këtë mënyrë”.

/DRONI.al/