Persona të paidentifikuar kanë sulmuar një zyrë elektorale të Partisë Socialiste në qytetin e Korçës gjatë orëve të pasdites së të dielës.
Mësohet se ngjarja ka ndodhur në lagjen numër 4 të qytetit juglindor, ku autorët kanë thyer xhamat e zyrës elektorale.
Ndërkaq të shtunën, banesa e kreut të Asamblesë së Partisë Socialiste në qytetin e Maliqit është kthyer në objekt sulmi të një grupi personash, të cilët kanë qëlluar me gurë në drejtim të objektit.
Ngjarja është regjistruar rreth orës 22:00 të së shtunës dhe ka shkaktuar disa dëme materiale.
Kreu i asamblesë së PS-së, Bashkim Azisllari, pasi ka bërë denoncimin e rastit, ka rrëfyer detajet rreth kësaj ngjarjeje, duke përjashtuar konfliktet e çdo lloji.
Për të dy rastet, Policia e Korçës ka nisur hetimet për identifikimin e autorëve dhe kapjen e tyre.
