Njësia Task -Force Antikorrupsion në Prokurorinë e Tiranës ka mbledhur prova e dëshmi që bëjnë përgjegjës disa persona për abuzimin me rimbursimin e ilaçeve në Tiranë, që dyshohet se kalon shifrën e 500 mijë eurove në buxhetin e shtetit. Ndërkohë, mësohet se Prokuroria e Tiranës ka firmosur 7 urdhra-arresti për personat e dyshuar në abuzimin me rimbursimin e ilaçeve, gjatë viteve 2014-2015. Policia ka bërë të ditur sot se ka ekzekutuar 7 urdhër- arrestet, duke prangosur 2 zyrtarë të sektorit ët fondit shëndetësor të rimbursimeve si dhe 5 farmacistë.
Hetimet për skandalin e rimbursimit të ilaçeve, kryesisht për sëmundjet kancerogjene janë duke vazhduar me ritëm të shpejtë. Ndërkohë që mësohet se nga 7 personat që janë bërë përgjegjës deri tani, disa prej tyre janë administratorë dhe përfaqësues të farmacive që kanë qarkulluar recetat dhe faturat e ilaçeve të rimbursuara në mënyrë të paligjshme. Pjesa tjetër e personave, për të cilët është firmosur dhe ekzekutuar urdhër-arrestet, mësohet se janë zyrtarë të sektorit të fondit shëndetësor të rimbursimeve në qendër dhe në Tiranë.
Dy ditë më parë, Prokuroria sekuestroi katër zyra të institucioneve shëndetësore, duke dërguar për ekspertim katër kompjuterët e gjetur në to. Në këta kompjuterë po kërkohen të dhëna për listën e ilaçeve të rimbursuara dhe vlerën e parave që janë paguar në mënyrë të parregullt nga fondi shtetëror i rimbursimeve.
Të arrestuar
Edlira Mara – Juriste pranë Drejtorisë Rajonale të Fondit
Keti Mahmutaj – Punonjëse pranë Drejtoria Rajonale e Fondit
Hysen Roci – Administrator i Farmacisë, Lundër
Mimoza Tufi – Drejtuese teknike e farmacisë Lundër
Nikolla Thanasi – Drejtues Teknik i farmacisë “Nutrimed”
Arens Spahiu – Drejtues Teknik i farmacisë Bërzhitë
Adelina Manaj – Drejtuese Teknike e farmacisë “Adelina”
