Takimet mes drejtuesve të lartë të institucioneve të antikrimit në Shqipëri, jemi mësuar të ndodhin përherë me “iniciativën” dhe “ftesën” e ministrit të Brendshëm Saimir Tahiri. Çuditërisht sot, një takim midis kryepolicit Haki Çako dhe kryeprokurorit Adriatik Llalla, është bërë, për herë të parë, pa praninë e Saimir Tahirit.
Në takimin e punës, mes tyre, Drejtori i Policisë së Shtetit Drejtues Madhor Haki Çako zhvilloi dhe Prokurori i Përgjithshëm Adriatik Llalla, diskutuan çështjet e forcimit të bashkëpunimit ndërmjet dy institucioneve, shkëmbimi i opinioneve për propozimet ligjore që lidhen me rritjen e aftësisë investiguese nga të dy institucionet ndaj grupeve kriminale, të krimit të organizuar, e në veçanti të korrupsionit.
Palët ndanë mendime edhe për hapat e përbashkëta që duhet të hidhen për forcimin e luftës kundër krimit kibernetik, si dhe për një sërë hetimesh që të dy institucionet në bashkëpunim me njëri- tjetrin, pritet të finalizojnë.
Një theks i veçantë gjatë takimit u vendos për koordinimin më të mirë të veprimeve Polici-Prokurori, për hetimet ndërkombëtare ku grupet kriminale të krimit të organizuar përdorin si origjinë, transit apo destinacion vendin tonë.
Njëkohësisht është dakordësuar për forcimin e bashkëpunimit ndërmjet autoriteve policore dhe Prokurorisë me vendet e tjera, duke e vlerësuar si domosdoshmëri këtë bashkëpunim për të qenë të suksesshëm në këtë drejtim.
Në takim ishin të pranishëm edhe Drejtori i Përgjithshëm për Hetimin e Krimit të Organizuar dhe Krimeve të Rënda Drejtues i Lartë Ardian Çipa, Drejtori i Drejtorisë së Hetimit, Kontrollit dhe Ndjekjes Penale dhe i Drejtorisë së Task-Forcës në Prokurorinë e Përgjithshme, Kostaq Beluri.
Takohen Haki Çako e Adriatik Llalla, çuditërisht mungon Saimir Tahiri
