Një ngjarje e rëndë ka ndodhur në një fshat të Greqisë, ku një shqiptar i sapo dalw nga burgu, ka vrarë me thikë bashkëshorten e tij 33 vjeçe në prani të fëmijëve të mitur 8 dhe 10 vjeç. Krimi ndodhi në Nafplio, ku 45-vjeçari qëlloi për vdekje me thikë të shoqen, sepse siç bëhet e ditur, ajo i kishte kërkuar divorcin.
Bashkëshortët janë grindur ashpër me njëri-tjetrin dhe burri ka rrëmbyer thikën duke goditur të shoqen. Fëmijët të tmerruar kanë vrapuar në katin e sipërm, në banesën ku jeton pronari i shtëpisë dhe kanë thënë: “Nëna jonë është në mes të gjakut. Babai e ka lënduar. Ejani shpejt”.
E plagosur rëndë gruaja është transportuar në spital, por si pasojë e plagëve në qafë dhe shpatull ajo nuk ka mundur të mbijetojë duke ndërruar jetë.
Policia greke ka arrestuar shqiptarin, i cili kishte vetëm pak kohë që kishte lënë qelitë e burgut.
Siç raportojnë mediat greke, ai ishte liruar me 4 prill të këtij viti nga një burg në Korfuz dhe ishte deportuar në Shqipëri.
Ndërkohë vetëm pak ditë më parë ai kishte hyrë ilegalisht në shtetin grek, duke shkaktuar edhe tragjedinë në familjen e tij.
Tragjedia me sa duket ishte paralajmëruar nga gruaja, e cila iu kishte thënë fqinjëve të saj pak para vrasjes se, “Burri im më tha se do të më vrasë. Ju lutem më ndihmoni. Burri im më tha se do të më vrasë dhe do të marrë fëmijët”.
Sipas shtypit grek, gruaja kishte frikë të bënte denoncimin në polici, për shkak se ajo dhe fëmijët e saj nuk kishin leje qëndrimi.
Greqi, shqiptari del nga burgu dhe vret gruan, fëmijët e mitur kërkojnë ndihmë te fqinjët
