“Ne shpresojmë të thellojmë bashkëpunimin me Serbinë, dhe së bashku të ecim në rrugën e paqes dhe të integrimit europian, me besimin se Shqipëria dhe Serbia, shqiptarët dhe serbët mund të bëjnë për Ballkanin sot atë që Franca dhe Gjermania, francezët dhe gjermanët bënë për Europën pas Luftës së Dytë Botërore”.
Kështu është shprehur Edi Rama për gazetën serbe “Danas” një ditë nga vizita e kryeministrit serb Alekandër Vuçiç në Tiranë.
Kjo është vizita e parë e një kryeministri serb në Shqipëri dhe do të pritet me të gjitha nderimet që përcakton protokolli shtetëror. Çka nënkupton se siç u ngrit flamuri shqiptar në pallatin “Serbia” dhe u këndua himni shqiptar, kur Rama vizitoi Beogradin më 10 nëntor, edhe në Tiranë nesër do të këndohet himni serb dhe do të ngrihet flamuri serb.
“Kjo vizitë ka një domethënie të veçantë është një indikator i vendosmërisë tonë për të ecur përpara në rrugën që nisëm në Berlin, gushtin e kaluar, nën lidershipin vizionar për Ballkanin të kancelares gjermane Angela Merkel”, tha Edi Rama.
Kryeministri theksoi se Shqipëria ka “besim në vizionin dhe vullnetin e kancelares gjermane Angela Merkel sa i takon të ardhmes në Ballkan”
”Jo vetëm sepse ne ndajmë të njëjtin vizion dhe besim se Europa e sotme i duhet Ballkanit aq sa Ballkanit i duhet Europa, por sepse jemi të vetëdijshëm se nëse ne nuk punojmë së bashku për të ardhmen jemi të gjithë të kërcënuar nga kthimi i të kaluarës”.
”Nuk ka dyshim se suksesi i bashkëpunimit të ndërsjellët përcakton jo vetëm fatin e shqiptarëve dhe serbëve në të ardhmen por gjithashtu dhe fatin e projektit të një Europe të bashkuar si projekti më i madh i paqes dhe njerëzimit që është konceptuar dhe implementuar ndonjëherë”, theksoi Ram për gazetën serbe “Danas”.
Rama nesër takon Vuçiç në Tiranë me mendjen dhe besimin te vizioni i Merkel në Berlin
