Policia e Tiranës ka vënë në pranga tre persona të cilët akuzohen se shfrytëzonin për prostitucion disa balerina dhe një 16-vjeçare, e cila ishte shpallur në kërkim si e humbur. Burime zyrtare nga Drejtoria e Policisë së Qarkut Tiranë bënë me dije se sot në kuadër të operacionit “Tallava 2015” u arrestuan në flagrancë për veprat penale të “Shfrytëzimit të prostitucionit” dhe “Mbajtjes së lokaleve për prostitucion” shtetasit, F. Xhemali (Kuçi), 26 vjeç, lindur në Berat dhe banuese në Tiranë; Ilir Peraj, 46 vjeç, lindur në Shkodër dhe banues në Tiranë; Anila Morava, 43 vjeç, lindur në Berat dhe banues në Tiranë. Po kështu u procedua në gjendje të lirë shtetasi A. D., 16 vjeç, banues në Tiranë, për veprën penale të “Shfrytëzimit të prostitucionit”.
Në bazë të informacioneve që Policia e Tiranës posedonte prej një muaj, u arrit te dokumentohej aktiviteti i prostitucionit, i cili zhvillohej në një lokal në periferi të Tiranës. Dyshimet për këtë aktivitet të paligjshëm bien mbi shtetasin Ilir Peraj, ku nga kontrolli i ushtruar në këtë lokal janë konstatuar disa vajza balerina të cilat kanë qenë të punësuara në mënyrë të paligjshme.
Në këtë ambient është gjetur e mitura me inicialet F. Gj., e cila ka qenë shpallur në kërkim si person i larguar nga banesa, në datë 06. 05. 2015. Kjo shtetase dyshohet se është shfrytëzuar për prostitucion në këtë ambient. Materialet do ti kalojnë Prokurorisë Rrethit Gjyqësor Tiranë për hetime të mëtejshme.
Një 16 vjeçar shfrytëzonte balerinat, arrestohen edhe dy gra e një burrë për prostitucion
