Deputeti socialist Ben Blushi ka udhëtuar sot drejt Maqedonisë, ku fillimisht ka vizituar qytetin e Kumanovës, i cili u bë arenë e përplasjes së forcave të policisë maqedonase dhe një grupi të armatosur, ku humbën jetën 22 persona.
Ai ka parë nga afër situatën dhe është takuar me banorë, shtëpitë e të cilëve janë rrënuar nga “lufta” e ditëve më parë.
Gjatë takimi Blushi tha se, “Jam këtu për të parë ç’po ndodh me civilët e pafajshëm” duke e quajtur shtetin maqedonas të pabesë.
“Ju kanë cenuar pronat dhe dinjitetin njerëzor. Ju kanë cenuar pabesisht dhe padrejtësisht. Kur shteti është i pabesë, ky është fundi i tij”, ka thënë Blushi.
Deputeti socialist Ben Blushi e cilësoi rastin e Kumanovës të frikshëm për shqiptarët, por dhe për vetë Maqedoninë.
“Maqedonia sot ka një problem serioz me demokracinë dhe më vjen keq të them, por ajo nuk është një shtet demokratik”, tha Blushi, pasi vizitoi sot “Lagjen e Trimave” në Kumanovë.
Ben Blushi ka vizituar banorët dhe shtëpitë e tyre të rrënuara, duke theksuar se është tmerruar nga ngjarja që ka parë dhe përjetuar në këtë lagje, e cila sipas tij, është goditur nga një terror i paparë, informon INA.
Deputeti socialist Ben Blushi ditë më parë në Parlamentin Shqiptar ka ngritur çështjen e Kumanovës.
