Është mbajtur sot në Bruksel takimi i shtatë i Këshillit të Stabilizim-Asocimit, Shqipëri-BE. Delegacioni shqiptar përfaqësohej nga ministrja e Integrimit, Klajda Gjosha, ministri i Jashtëm, Ditmir Bushati, dhe kryetarja e Komisionit të Integrimit, Majlinda Bregu. Nga ana tjetër, delegacioni i Bashkimit Europian kryesohej nga komisioneri Johannes Hahn dhe ministri i Jashtëm i Letonisë, pasi Letonia ka presidencën e radhës së BE.
Gjatë konferencës së përbashkët për shtyp të mbajtur nga Ministri Ditmir Bushati, komisionari Johanes Hahn dhe Ministri i jashtëm i Letonisë, Edgars Rinkevics u theksua nevoja e vijimit të reformave për përmbushjen e kritereve për integrimin në BE.
Komisioneri për Zgjerimin, Johannes Hahn, duke iu përgjigjur interesit të mediave, ka nënvizuar se zgjedhjet lokale do të jenë një hallkë e rëndësishme në procesin e integrimit.
“Shpresoj që politikanët shqiptarë, të mësuar me retorika të forta, të qetësohen. Këto zgjedhje, sikurse në vitet e kaluara, do të monitorohen nga BE-ja. Shpresojmë që ato të jenë sipas standardeve”, ka thënë Hahn.
Komisioneri Hahn tha se zgjedhjet e 21 qershorit janë përgjegjësi për qytetarët shqiptarë dhe politikën. Për sa i përket procesit të monitorimit të zgjedhjeve nga OSBE, Hahn tha se shpreson që raporti përfundimtar të përmbushë pritjet e BE-së.
“Mendoj se është përgjegjësi për qytetarët shqiptarë. Do ketë një grup vëzhguesish nga OSBE-ja dhe jam i kënaqur, shpresoj që raporti do të përmbushë pritjet tona”, tha Hahn.
Sa u takon reformave, zyrtari i lartë evropian ka nënvizuar rëndësinë e fokusimit të administratës shqiptare te cilësia e tyre dhe jo tek shpejtësia, duke i rekomanduar Tiranës zyrtare që të alternojë këta dy faktorë.
“Jam optimist se Shqipëria mund të tregojë aftësi solide në përmbushjen e 5 prioriteteve. Në fillim të vjeshtës do të kryhen vlerësimet e para dhe më pas do të shohim se si do të jetë raporti. Ne presim një progres të sinqertë”, ka thënë Hahn.
Ndërsa ministri i jashtëm i Letonisë, Rinkevics tha se “zgjedhjet në Shqipëri janë një test dhe një hap i rëndësishëm për integrimin në BE. Për sa i përket fushatës ai tha se politikanët duhet të qetësojnë pak deklaratat dhe të vijohet me procesin politik”, u shpreh Rinkevics.
“Po absolutisht i kemi konsideruar këto zgjedhje si një hap të rëndësishëm. Politikanët janë mësuar me retorika shumë të forta, ndoshta duhet të qetësohen pak deklaratat dhe të vijohet me procesin politik.
Ministri i Jashtëm shqiptar, Ditmir Bushati, deklaroi se Shqipëria mbetet e angazhuar për implementimin e 5 prioriteteve të vendosura nga BE në kuadër të procesit të integrimit.
Shefi i diplomacisë shqiptare ka nënvizuar se krahas kësaj kërkese, të theksuar nga Brukseli, Këshilli i Stabilizim-Asociimit kërkoi vijimin e angazhimit të Shqipërisë në nivel rajonal sa i takon marrëdhënieve të mira fqinjësore.
Më 8 Maj u konstituua edhe Këshilli Kombëtar i Integrimit nën drejtimin e opozitës, nga kryetarja e Komisionit Parlamentar të Integrimit, Majlinda Bregu.
FOTO/ BE: Zgjedhjet test për integrimin, kujdes me cilësinë e reformave
