Kryetari i Aleancës Kuqezi, Kreshnik Spahiu, deklaroi se kandidatura e Gjergj Bojaxhiut si kandidat për Bashkinë e Tiranës nuk është rastësi. Në një interviste televizive të dhënë mbrëmjen e së premtes në emisionin “Zonë e Lirë” të gazetarit Arjan Çani, në “Tv Klan”, Spahiu deklaroi se në zgjedhjet parlamentare të 23 qershorit të vitit 2013, Edi Rama dhe analisti Eduard Zaloshnja i kishin kërkuar që të fuste në listat zgjedhore kandidaturën e Bojaxhiut. Kreshnik Spahiu tha se qëllimi i Ramës ishte përçarja e votave të së djathtës, ndërsa theksoi se ai nuk e kishte pranuar propozimin e tij.
“Në zgjedhjet e qershorit 2013 Edi Rama me Eduart Zaloshnjen më kërkuan që në koalicion me ta të vendosja Gjergj Bojaxhiun si kandidat i Aleancës Kuqezi në Tiranë, për të çarë votat e së djathtës, por nuk pranova”, deklaroi Kreshnik Spahiu.
Gjergj Bojaxhi ka shpallur kandidaturën si i pavarur për Bashkinë e Tiranës në zgjedhjet lokale të 21 qershorit 2015.
Gjergj Bojaxhi projekt i Edi Ramës që në 2013 për të përçarë votat e PD-së
