Mazhoranca ka miratuar sot në Parlament ligjin për hapjen e dosjeve, i cili përjashton deputetët nga verifikimi por e shtrin atë mbi të institucionet tjera publike. Opozita ka votuar kundër. Heqja e lustracionit nga ligji lidhet me disa deputetë të PS-së që kanë pasur poste të rëndësishme në vitet e fundit të komunizmit, mes të cilëve Gramoz Ruci dhe disa deputetë që vijnë nga drejtësia.
Sipas ministrit Erion Veliaj ky ligj ka në themel të tij transparencën dhe jo lustracionin, i cili u rrëzua vite më parë nga Gjykata Kushtetuese.
Por, para kësaj deklarate, deputetja Mesila Doda, e cila është edhe relatorja e projektligjit të propozuar nga shoqëria civile dhe e mbështetur nga e djathta, ka theksuar se vetëm lustracioni mund të sjellë drejtësi për këtë shtresë të shoqërisë.
“Ke kryetar grupi parlamentar, ke kryetar të Komisionit të Ligjeve dhe deputetë në grupin parlamentar pjesë të ish-funksionarëve të lartë të regjimit. Ponc Pilatin nuk e bën dot”, tha Mesila Doda, deputete e Partisë Demokratike.
Fatmir Mediu, kreu i Partisë Republikane tha se “duhet të rihapim dosjet e bashkëpunëtorëve të sigurimit të shtetit sepse transparenca është elementi i parë i funksionimit normal të një shoqërie. Lustracioni është një domosdoshmëri dhe pavarësisht votimit sot, kjo histori nuk mbyllet”.
Deputeti i Partisë Socialiste, Pandeli Majko tha se “propozimet që kanë sjellë kolegët e opozitës janë hedhur poshtë nga Gjykata Kushtetuese. Fajtorët për atë që ka ndodhur në Shqipëri nuk janë këta që ne do u hapim dosjen, por është një vertikale e madhe dhe të gjithë duhet të pranojnë pjesën që u takon”, tha Majko.
Kjo është hera e katërt që në parlament diskutohet ose kalon një ligj që lidhet me krimet e komunizmit. I pari ishte ai që lidhej me krimet e komunizmit dhe që kaloi në vitin 1995. Pak vite më vonë një ligj tjetër kërkonte kontrollin e zyrtarëve të lartë nëpërmjet një komisioni shtetëror. Në vitin 2007 nuk u kalua dot një ligj për lustracionin ndërsa tani sërish kjo histori është e pambyllur.
