Prokuroria për Krime të Rënda i ka kërkuar këtë të martë gjykatës konfiskimin e llogarive bankare të shtetasit Kastriot Ismailaj, administrator i shoqërisë “Adriatic Develoment Corporation LTD”.
Kastriot Ismailaj njihet si miku i Ilir Metës, fakt ky i denoncuar nga ish-ministri Dritan Prifti, vite më parë, por edhe nga mediat, sot të njohura për mbështetjen e qeverisë.
Sekuestrimi i pasurisë
Sipas Prokurorisë së Përgjithshme, mësohet se bëhet fjalë për sekuestrimin e llogarive bankare në shumat totale 3.2 milionë USD dhe 450 mijë euro të shtetasit Kastriot Ismailaj, bazuar në ligjin “Për parandalimin dhe goditjen e krimit të organizuar e trafikimit nëpërmjet masave parandaluese kundër pasurisë”.
Prokuroria për Krime të Rënda, si struktura përgjegjëse për zbatimin e këtij ligji, ka regjistruar procedimin penal, në bazë të akteve të përcjella nga Prokuroria e Tiranës, e cila po e heton Ismailajn për veprën penale të “mashtrimit”.
Prokuroria thekson se, fillimisht ndaj llogarive bankare të administratorit Ismailaj, gjykata ka vendosur masën e sekuestros preventive (paraprake). Ismailaj, i cili është në dijeni të vendosur së sekuestros, nuk ka paraqitur asnjë dokument për provuar ligjshmërinë e burimit të krijimit të pasurive.
Miku i Ilir Metës
Më se katër vite më parë, në ditët e post-publikimit të videos “prifti”, në të cilën implikoheshin aferat e Ilir Metës, ish-minsitri Dritan Prifti denoncoi faktin se Kastriot Ismailaj njihet si miku i Ilir Metës.
“Kastriot Ismailaj quhet miku i Ilir Metës. E dine të gjithë që është miku i Ilir Metës. Ka dosje në vende të ndryshme, për aktivitete të ndryshme me të cilat është marre ai. Ilir Meta i kërkoi CEZ-it ti japë atij një kontrate për të mbledhur teë gjitha borxhet e vjetra të kompanisë: 200 milion Euro, që nëse ky i mbledh 50 për qind i merr ky dhe 50 për qind i shkojnë KESH-it”, bënte të ditur në një intervistë të tij, Dritan Prifti, në emisioni “Top Story”, të datës 13 janar 2011.
Ndërkohë, të nesërmen, në datën 14 janar 2011, gazeta “Tema”, duke konfirmuar se Kastriot Ismailaj, ishte jo vetëm mik, por edhe si “sekseri i Ilir Metës”, denonconte afera të këtij biznesmeni, në Kongo, ku sipas kësaj gazete, kishte blerë një minierë zinku, me qëllim pastrimin e parave.
