Shoqata Gjermane e Industrisë dhe Tregtisë (DIHA) ka prezantuar sot raportin për klimën e biznesit në Shqipëri për vitin 2015. Drejtoresha e kësaj shoqate Annete Kasten u shpreh se 47 për qind e bizneseve vlerësojnë negative situatën ekonomike për vitin 2015, përkundër 34 për qind e kompanive që e vlerësojnë situatën ekonomike si “të kënaqshme”. Të njëjtën gjë vlerësoi edhe Dhoma Amerikane e Tregtisë një ditë më parë.
Annete Kasten tha se vlerësimet më të këqija janë për investimet të cilat shprehen se 66 për qind nuk do të rrisin investimet në Shqipëri. Po ashtu ajo është e pakënaqur nga perceptimi për stabilitet politik dhe social.
Ambasadori gjerman në Tiranë, Helmut Hoffman i pranishëm në aktivitet u shpreh se tendenca e zhvillimit ekonomik në vend është qartësisht pozitive. “Ne ndjekim me interes anketimin e DIHA-s”, tha ai.
Shifrat
Drejtoresha e DIHA-s, Annete Kasten tha se krahasuar me një vit më parë Shqipëria vlerësohet më mirë si vend për të bërë biznes, por aktualisht të anketuarit nuk janë të inkurajuar për investime të reja.
19 për qind e të anketuarve e vlerësojnë “më mirë” situatën ekonomike, ndërkohë që vitin e kaluar këtë vlerësim e kishin vetëm 13 për qind e bizneseve. 34 për qind e kompanive vlerësojnë situatën ekonomike si “të kënaqshme”, ndërkohë që 47 për qind e të anketuarve e vlerësojnë atë “si negative.
Gjithashtu, Kasten theksoi se për sa i përket së ardhmes së ekonomisë shqiptare në përgjithësi, kompanitë shpresojnë në përmirësimin e situatës.
Më pak pozitive duket të jetë situata e vetë bizneseve. Vetëm 23 për qind e bizneseve deklarojnë se situata e tyre është përmirësuar, ndërkohë që në vitin 2014 kjo shifër arrinte në 36 për qind. Për 48 për qind të të anketuarve situata ka qëndruar e pandryshuar, ndërsa 29 për qind e tyre e shohin si të përkeqësuar . Për më tepër, vetëm 66 për qind e bizneseve që operojnë tashmë në Shqipëri, do të investonin sërish në këtë vend.
Anketimi
Ky anketim vjetor, i cili u plotësua nga kompanitë anëtare të DIHA-s, në periudhën 2 shkurt deri më 2 mars paraqet një vlerësim të vitit të shkuar si dhe një parashikim për vitin në vazhdim. Element i rëndësishëm i këtij pyetësori është vlerësimi i faktorëve, të cilët janë vendimtarë në zgjedhjen e një vendi për të investuar.
Anketimi për Klimën e Biznesit është një realizim i përbashkët dhe me të njëjtën gamë pyetjesh, i 16-të Dhomave Gjermane të Tregtisë me Jashtë në Europën Qendrore dhe Juglindore dhe plotësohet në të gjitha vendet e rajonit në të njëjtën kohë.
Shoqata Gjermane e Industrisë dhe Tregtisë në Shqipëri (DIHA) është një shoqatë e pavarur, e krijuar nga kompani të ndryshme në përputhje me legjislacionin shqiptar, me seli në Tiranë. DIHA përfaqëson interesat e biznesit gjerman në Shqipëri.
