Deputetja e PS, Arta Dade ka komentuar eksodin e shqiptarëve në vendet e BE, duke i bërë thirrje qeverisë që të mos justifikohet me deklarata. Kryetarja e Komisionit të Jashtëm, Arta Dade e pranishme në tryezën me temë “Shqipëria dhe Kosova, e ardhmja e përbashkët”, duke folur për eksodin e shtetasve të Shqipërisë e Kosovës, vuri gishtin te qeveritë.
Sipas saj mënyra më e mirë që njerëzit mos largohen nga Shqipëria është krijimi i klimës së biznesit për shtetasit shqiptarë. Sipas Dades, iu takon qeverive të krijojnë shpresë për qytetarët.
“Qeveritë të krijojnë shpresë te qytetarët, qeveritarët të mos justifikohen me deklarata. Të krijohet klimë pozitive për bizneset, të krijohet perspektivë për qytetarët tanë”, tha Dade.
Sipas Dade, duhet të kufizohen tentativat për largime nga vendi.
“Nëse s’duam largime, t’iu sjellim qytetarëve Evropën”, shtoi Dade.
Sipas saj të dyja qeveritë duhet të punojnë për qytetarët e tyre.
Ndërsa deputeti Bumçi deklaroi në këtë tryezë që bashkimi mes Shqipërisë dhe Kosovës duhet të vijë përmes SHBA-BE.
“Shqiptarët avancuan shumë pas rënies së komunizmit. Rruga e Kombit është urë e mire lidhëse me Kosovën. Ka shumë rëndësi bashkëpunimi parlamentar”, shtoi ai.
Arta Dade për eksodin: Qeveritarët të krijojnë shpresë, të mos justifikohen me deklarata
