Ministria e Punëve të Jashtme të Republikës së Shqipërisë thirri sot në një takim dhe i kërkoi sqarim Ambasadorit të Federatës Ruse në Tiranë, Aleksander Karpushin, lidhur me deklaratat për shtyp të para pak ditëve të MPJ-së ruse.
Ministria e Punëve të Jashtme e Republikës së Shqipërisë i konsideron deklaratat e MPJ-së ruse të papranueshme dhe akuzat ndaj dy shteteve sovrane të Shqipërisë dhe Kosovës për ngjarjet e fundit në Maqedoni, destabilizuese. “Këto deklarata përbejnë një shantazh dhe nuk i shërbejnë aspak klimës konstruktive në rajon e aq më pak parimeve të gjithë-pranuara të së drejtës ndërkombëtare” , nenvizohet nga MPJ. “Shqipëria është vend anëtar i NATO-s dhe kandidat në BE, dhe çdo deklaratë shantazhuese e Rusisë do të shihet veç përmes këtij prizmi”, deklaron MPJ. “Ambasadorit iu theksua se Federata Ruse duhet të shohë realitetin në sy në Ballkanin Perëndimor, ku pavarësia e Kosovës përben një kontribut të qenësishëm për të ardhmen demokratike dhe stabilitetin rajonal.”, përfundonte buletini i MPJ.
MPJ ruse publikoi katër ditë më parë një deklaratë përmes së cilës shprehej kundërshtimi ndaj deklaratave të Kryeministrit Rama, lidhur me bashkimin e Shqipërisë me Kosovën, sikurse thonë ata. “Retorika për Shqipërinë e Madhe nuk kontribuon në ruajtjen e klimës së stabilitetit dhe marrëdhënieve të mira fqinjësore në Ballkan”, thuhet në deklaratën ruse. Në vijim theksohet se “nuk ka rëndësi se çfarë konsideratash apo motivesh mund të qëndrojnë prapa fjalëve të Ramës, por përsëritja e retorikës panshqiptare nuk ka gjasa që të kontribuojë në ruajtjen e klimës së stabilitetit dhe të fqinjësisë së mirë në rajonin e Ballkanit, që është jetik për Rusinë dhe vendet evropiane”.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
