Ben Blushi: Varfëria emergjencë kombëtare, të varfrit do të vijnë në Parlament dhe do i nxjerrin jashtë deputetët

Ben Blushi ka zhvlerësuar sot pretendimet dhe justifikimet e qeverisë, për eksodin e kohëve të fundit të shqiptarëve, drejt vendeve të BE-së. Në fjalimin e tij në Parlament, deputeti socialist, ka përmendur si shkak kryesor të këtyre largimeve, varfërinë dhe mungesën e perspektivës për punësim.
Deputeti i PS-së, u shpreh më tej se situata e krijuar me ikjet masive të shqiptarëve është një emergjencë kombëtare. Ai tha se është turp i qeverive që shqiptarët diskriminohen për arsyen e vetme se janë të varfër.
“Në 25 vite kemi humbur 1/3 e popullsisë. Nuk ikin se s’ka ujë, s’ka diell, ka një arsye, ne qeverisemi shumë keq. Shihni shifrat e migrimit, vetëm për një arsye po ikin se jetojnë keq. Shqiptarët nuk persekutohen për shkak të festë, por se janë të varfër, i persekutojmë për shkak të mungesës së pasurisë, je i varfër nuk shkollohesh, merr me pak pension, nuk fiton gjyqe. Diskriminimi është Standard i keq, po diskriminojmë të varfrit, për turpin tonë”, tha Blushi.
Sipas tij, asnjë popull nuk është tretur si Shqipëria në 25 vite.
“Nuk është punë qeverie, gjithkush duhet të kuptojë se kostoja e atyre që ikin është më e madhe, emigracioni ka kosto më të lartë, kështu nuk rregullohet papunësia, tokat nuk punohen, zvogëlohet tregu”.
Më tej Ben Blushi shtoi se, “nëse vazhdon kjo situatë për 20 apo 30 vite Shqipëria përgjysmohet. A na vlen neve ky vend? Kjo është e padrejtë, ta përballojmë sot këtë kosto. Të ndajmë kostot për të varfrit. Ka arsye për të dhënë alarmin, është emergjencë kombëtare Shqipëria po zvogëlohet, po tkurret”.
Deputeti socialist, një nga zërat kundër politikave të ndjekura nga qeverisja është treguar i ashpër dhe ka kërkuar ndryshimin e situatës, pasi në të kundërt sipas tij, “të varfrit do vijnë në parlament dhe do i nxjerrin jashtë deputetët”.
“Më mirë nxisni parazitizmin se emigracioni. Ky vend bëhet i pa jetueshëm nëse s’ka njerëz. Pesimizmi që ka kapur Shqipërinë është fatalitet kombëtar. Duhet ta ndryshojmë këtë fatalitet duke u dhënë më shumë, duke rritur pagat, pensionet, duke investuar, duke e bërë shoqërinë më të drejtë. E dini pse ikni ata që kanë kalamaj, kanë vetëm një problem, kanë frikë se fëmijët do ti ngjajnë. Vetëm të varfrit kanë frikë se fëmijët e tyre do ti ngjajnë, varfëria është fatale. Shoqëria ka vdekur nuk ka shpresë, kjo është arsyeja pse ikin. Ka akoma mundësi që diçka të ndryshojë, pavarësisht se nuk jam shumë optimist. Nëse nuk ndryshon diçka, të varfrit do vinë në parlament do na nxjerrin jashtë”, përfundoi Blushi.