Eurodeputeti Eduart Kukan: Politika të mos ndërhyjë te gjyqësori

Eurodeputeti Eduart Kukan komenton arrestimin e dy deputetëve në Shqipëri dhe kërkon që politika të mos ndërhyjë. Ai kërkon që institucionet e drejtësisë të hetojnë sa më shpejt dhe me objektivitet këtë çështje.

Si vlerësoni heqjen e imunitetit dhe arrestimin e dy deputetëve?
Para së gjithash dua të them se situata në Shqipëri është shumë konfuze. Sa më shpejt të hetohet me objektivitet kjo situatë, aq më mirë është. Shprehemi gjithmonë me kolegët tanë, se gjyqësori duhet të jetë i pavarur dhe pa asnjë ndërhyrje. Por, kjo do të thotë gjyqësor objektiv gjithashtu, që nuk ka me të vërtetë ndërhyrje politike. Nuk dua t’i cilësoj kërkesat për arrestimet e dy anëtarëve të Parlamentit, sepse është gjithnjë situatë dramatike, kur Parlamenti duhet të lirojë anëtarët e tij për të tilla hetime. Kam kuptuar se Prokurori i Përgjithshëm i tanishëm është emëruar gjatë qeverisjes së mëparshme, përpara qeverisë aktuale, kështu që nuk e kuptoj. Mos më kërkoni  gjykime politike mbi këto kërkesa gjyqësore se nuk është mirë për ju.

A besoni se Prokuroria pati ndërhyrje politike, siç pretendon opozita?
Unë besoj në supozimin e pafajësisë derisa gjithçka do dëshmohet 100 për qind. E deri atëherë, nuk është e këshillueshme që të nxjerrim të tilla përfundime.

A e shihni këtë si një hap para, apo pas, për dekriminalizimin dhe reformën në drejtësi?
Kur ishim në Tiranë me kolegun Flakenshtajn u bisedua shumë mbi faktin se do të ishte mirë vërtet nëse do të ndërmerrnim disa procedura që do të parandalonin këto lloj situatash në të ardhmen. Mendoj se kishte rëndësi, u pajtua dhe u firmos nga të dy palët dhe tani ata duhet të tregojnë, se janë të gatshëm për ta bërë këtë. Dekriminalizimi, megjithëse nuk e di nëse të gjithë e kanë qejf këtë fjalë në Shqipëri, ka rëndësi që njerëzit në Parlament të jenë të pastër, me të dhëna e ndërgjegje të pastër, pasi janë ata që miratojnë ligjet, të cilat drejtojnë punën e shoqërisë. Në këtë kuadër, mendoj se kjo përpjekje është e rëndësishme.

Duke marrë parasysh negociatat për marrëveshjen e dhjetorit, dekriminalizimi i Kuvendit synohej për legjislaturën e ardhshme e jo aktualen, çfarë ndryshoi?  
Ka shumë çështje me rëndësi për Shqipërinë dhe kjo është një prej tyre. Ekziston njëfarë garancie se situata do ndiqet nga afër prej Parlamentit Europian dhe se dy zotërinjtë që shkuan atje në dhjetor do të shprehen, nëse diçka shkon keq, mbi baza objektive për zhvillimet. Por siç e thashë ka kaq shumë gërshetime tek kjo çështje dhe me ngritjen e çështjes nga prokurori, apo marrjen e dëshmisë prej tij nga dy deputetët, unë do të frenoja disi veten për të dhënë çdolloj konkluzioni, sepse nuk është mirë që ne të flasim mbi procedurat tuaja gjyqësore.

Në takimin e PPE-së në Strasburg, në praninë tuaj, kreu i opozitës përmendi qasjen e re “clean slate” duke shpjeguar se ekziston ‘mundësia për dialog me PS për të zgjidhur problemet aktuale’, por jo të së kaluarës, si 21 Janari, apo Gërdeci. A e mbështesni atë? 
Do t’ju jap përgjigjen e njëjtë siç dhe jam shprehur më parë. Nê mënyrë që të ecet përpara me rekorde të pastra, është e nevojshme të hetohet e të trajtohen disa çështje të dhimbshme të së kaluarës. Pa bërë këtë, nuk është e mundur që të arrihet progresi, për të cilin nuk do kishte asnjë dyshim, apo me disa çështje të hapura. Për këtë arsye, mendoj se hetimet mbi ngjarjet e 21 Janarit duhet të kryhen dhe duhet të përfundojnë zyrtarisht.

A besoni se ka një hapësirë të mundshme për të ndërhyrë BE, siç kërkon opozita, apo do prisni trajtimin e ngjarjeve nga autoritetet shqiptare?
Ne po e diskutojmë këtë. Po e diskutojmë së bashku me Komisionin për të gjetur qasjen më të mirë që do t’i ndihmonte Shqipërisë. Nuk kemi ende një përgjigje për këtë dhe presim që të vijë Komisioneri Hahn. Unë dhe kolegu Flekenshtajn do e diskutojmë mbi këtë me të, sepse i takon Komisionit të ndërhyjë, nëse do të ketë një përmbushje të kësaj kërkese. Sërish, e theksoj se ne po e diskutojmë këtë tani.

A jeni ende optimist se Shqipëria ka mundësi që të nisë këtë vit negociatat e anëtarësimit me BE?                                      Mendoj se kjo do të varet shumë nga performanca e vendit dhe se kjo do të varet shumë nga mënyra se si do të trajtohet kjo situatë e vështirë. Kjo mund të ngjajë në çdo vend, por ajo që ka rëndësi është se si merremi me të.

/DRONI.al/