Zhvillohet sot raundi i Pestë i Dialogut të Nivelit të Lartë BE-Shqipëri.
Takimi nis në orën 11: 45 dhe rreth orës 13.00 Komisioneri Hahn dhe Kryeministri Rama do të dalin para medias në konferencën e përbashkët për mediat.
Dialogu i Nivelit të Lartë për pesë Prioritetet Kyçe, do të bashkëkryesohet nga Komisioneri Hahn dhe Kryeministrin Edi Rama dhe në fokus ka punën e Shqiperisë për realizmin e reformave kyçe të nevojshme për fazën e ardhshme të procesit të integrimit të vendit në BE.
Një ditë më parë ndërsa vizitoi disa objekte të rëndësishme historike dhe kulturore Hahn dha mesazhin se klima politike mbetet një nga kushtet për integrimin e Shqipërisë në BE ndërsa paralajmëroi klasën politike se do të përballet me pasojat e kësaj situate.
Komisioneri Evropian për Politikën e Fqinjësisë Evropiane dhe Negociatat e Zgjerimit Johannes Hahn ndodhet që prej ditës së djeshme në Tiranë.
Gjatë qëndrimit të tij në Tiranë, Komisioneri Hahn do të takohet me Presidentin Nishani, Kryetarin e Parlamentit Meta, kryeministrin Rama, kryetarin e opozitës Basha dhe përfaqësues të biznesit dhe shoqërisë civile.
Ai do të vizitojë disa qendra kulturore në Tiranë, një projekt të financuar nga BE si dhe do të ketë një diskutim mbi çështjet e ndërlidhjes e transportit me Qeverinë.
Sot dialogu i Nivelit të Lartë BE-Shqipëri, në fokus realizmi i reformave për integrimin në BE
